Þann 12. mars komu þær Jónína Rósa Hjartardóttir formaður Átaks og Heiða Vigdís Sigfúsdóttir framkvæmdarstjóri Átaks í heimsókn í Mannréttindahúsið og sögðu frá starfi sínu og sögu. Átak er félag fatlaðs fólks sem er stýrt af fólki með þroskahömlun sjálfu og vinnur að því að efla réttindi, þátttöku og sjálfsákvörðun félagsmanna.
Félagið var stofnað árið 1993 þegar fatlað fólk krafðist þess að fá sjálft að ráða eigin lífi og segja sína sögu. Átak varð til vegna þess að rödd fólks með þroskahömlun vantaði í umræðuna og þörf var á beinu samráði við fólkið sjálft.
Í dag vinnur félagið meðal annars að félagsstarfi, vitundarvakningu og samráði við stjórnvöld, fyrirtæki og hagsmunasamtök um málefni fatlaðs fólks. Með starfi sínu vill Átak minna á að fatlað fólk veit best sjálft hvað það vill og þarf.
Í kynningunni var einnig fjallað um tengsl starfsins við samning Sameinuðu þjóðanna um réttindi fatlaðs fólks (SRFF). Þar má meðal annars nefna 19. grein, sem fjallar um rétt fatlaðs fólks til að lifa sjálfstæðu lífi og taka þátt í samfélaginu, og 4. grein, sem leggur áherslu á skyldu stjórnvalda til að hafa virkt samráð við fatlað fólk og samtök þeirra. Þá tengist starf Átaks einnig 8. grein samningsins, sem snýr að vitundarvakningu og baráttu gegn fordómum, 21. grein um tjáningarfrelsi og aðgang að upplýsingum og 32. grein um alþjóðlegt samstarf og miðlun reynslu.
Eins og slagorð félagsins segir: „Ekkert um okkur, án okkar.“
Setningin endurspeglar kjarnann í starfi félagsins, að fólk með þroskahömlun eigi sjálft að hafa rödd og áhrif í samfélaginu.