Ingileif Friðriksdóttir, aðstoðarmaður utanríkisráðherra, rithöfundur, þáttaframleiðandi og stofnandi fræðsluvettvangsins Hinseiginleikinn, hélt nýverið fyrirlestur í Mannréttindahúsinu þar sem hún fjallaði um stöðu mannréttindamála og vaxandi hatursorðræðu í íslensku samfélagi.
Í erindi sínu beindi Ingileif sjónum að aukinni sundrungu og uppgangi öfgrakenndra viðhorfa, bæði hérlendis og á alþjóðavísu. Hún hefur á undanförnum árum rannsakað þróun hatursorðræðu á Íslandi og bendir á merki um bakslag í réttindabaráttu ýmissa minnihlutahópa.
Fjallaði um hatursorðræðu í þáttunum Hatur
Ingileif var framleiðandi sjónvarpsþáttanna Hatur sem sýndir voru á RÚV í september 2025.
Í þáttunum var kastljósinu beint að hatursorðræðu, afleiðingum hennar og viðbrögðum samfélagsins þegar mörk tjáningarfrelsis eru þanin – eða brotin.
Þættirnir vöktu athygli um ábyrgð í opinberri umræðu og áhrif upplýsingaóreiðu á samfélagið. Í þeim var rætt við þolendur, sérfræðinga, aktívista og aðra sem koma að málaflokknum, með það að markmiði að varpa ljósi á stöðuna og skapa grundvöll fyrir upplýstari umræðu.
Hættur bergmálshella
Á fundinum varaði Ingileif sérstaklega við svokölluðum bergmálshellum – þegar fólk lokast inni í upplýsingaumhverfi sem staðfestir eingöngu fyrirfram mótaðar skoðanir þess. Slík þróun geti aukið fjarlægð milli hópa og ýtt undir öfgar.
Hún lagði áherslu á mikilvægi þess að hlusta hvert á annað og halda opnu samtali milli fólks með ólíkar skoðanir, fremur en að loka á umræðu.
Mikilvægi ábyrgðar og mannlegrar reisnar
Í erindi sínu undirstrikaði Ingileif mikilvægi þess að standa vörð um frelsi, mannlega reisn og ábyrgð í opinberri umræðu. Hún telur nauðsynlegt að samfélagið bregðist markvisst við hatursorðræðu og upplýsingaóreiðu og standi vörð um mannréttindi.